Uncategorized Archives - Seyðahundasamband Føroya

Tummas og Moss nr. 7 í finaluni í Hart voor West Friesland

Jónstein Petersen — Sun, 01 Nov 2026 21:31:51 +0000

Tummas og seyðahundurin Moss hava enn einaferð víst høgt støði í altjóða seyðahundakappingum.

Heili 105 hundar úr 9 ymiskum londum hava luttikið í innleiðandi kappingunum, sum hava verið skiparar yvir fýra kvalifitións vikuskiftir.

Tummas og Moss luttóku í einum av hesum vikuskiftinum í septembur, har teir komu í semifinaluna. Tað gekk somikið gott at teir komu í finaluna. Teir endaðu á einum flottum 7. plássi í finaluni í Hart voor West Friesland í Hollandi.

Hetta er eitt sera gott úrslit og prógvar at føroyskir seyðahundar, og teirra førarir, kunnu gera seg gladandi í altjóða kappingum.

Hjartaliga til lukku við flotta úrslitinum, Tummas og Moss.

Tummas og Moss

The post Tummas og Moss nr. 7 í finaluni í Hart voor West Friesland appeared first on Seyðahundasamband Føroya.

Kvikk vann á Viðareiði

Jónstein Petersen — Sun, 25 Oct 2026 23:08:06 +0000

Á seyðahundakappingini á Viðareiði eydnaðist Kvikk hjá Jónsteini Petersen at vinna kappingina við 87 stigum. Kappingin var spennandi og javn í toppinum, har bert tvey stig skiltu fyrsta og annað pláss.

Úrslitið hjá teimum fremstu varð:

Kvikk hjá Jónsteini Petersen – 87 stig
Taff hjá René Hansen – 85 stig
Moss hjá Tummasi Jacobsen – 69 stig

Sérliga vert er at leggja til merkis avrikið hjá unga hundinum Taff hjá Rene Hansen, sum ikki fyllir tvey ár fyrr enn um jólini. Hóast sín unga aldur megnaði hann at tryggja sær eitt framúr gott annaðpláss og hevur stórt potentiali sum kappingarhundur.

Kappingin á Viðareiði telur eisini við í samlaðu stigakappingini um úttøku til føroyska landsliðið. Teir sjey fremstu hundarnir vinna sær stig, og sostatt hevur kappingin stóran týdning fyri støðuna fram móti komandi landsliðsúttøku.

Við úrslitinum á Viðareiði er lagt upp til eina spennandi framhald av kappingarárinum, har fleiri hundar framvegis hava góðar møguleikar at vinna sær pláss á landsliðnum.

Næsta kapping verður í Husavík 7 nov.

The post Kvikk vann á Viðareiði appeared first on Seyðahundasamband Føroya.

Fyrsta Seyðahundakappingin í 2026/2027 kappingarárinum

Brandur Klettskarð í Kongsstovu — Thu, 22 Oct 2026 21:54:09 +0000

Leygardagin verður fyrsta seyðahundakappingin, í hesum kappingarárinum, á Viðareiði.

Landsliðið er komi heim aftur á klettarnar, og heystfjøllini eru gingin. Nú er tíðin tá seyðahundakappingarnar byrja aftur.

Byrja verður við kappingini hjá Norðoya seyðahundafelag. Hon verður sum vant á bøðnum Eystur í Heiðum á Viðareiði. Hetta hevur verið heimavøllur hjá Norðoya seyðahundafelag í nøkur ár. Umstøðurnar eru avbera góðar. Seyðurin kemur innan úr Viðvík, hann er róligur at reka, men tiltikin treiskur og ringur at fáa í rætt (Pen).

Viðingar bjóða suppu á døgura, kaffi og køka verða eisini at fáa. So tað er ikki at halda seg aftur at koma framvið.

Í ár hevur Norðoya seyðahundafelag fingið íran Paddy Fanning at koma heim til Føroya at døma kappingina. Paddy er óførur seyðahundamaður, hann hevur kappast nógv og hevur eisini nógvar royndir við at døma seyðahundakappingar. Paddy hevur seyð í írsku fjøllunum. Tað ber til at fylgja Youtube rás hansara “Churchmount sheepdogs”. Sunnudagin og mánadagin fer Paddy at halda skeið í seyðahunda venjing.

Hyggja vit at byrjurnarrøðini eru nakrir nýggjir hundar at síggja. Brá hjá Tóroddi Vang, Rútur hjá Brandi K. í Kongsstovu, Megg hjá Peri Joensen, Mars hjá Hera Ó. Dam og Nap hjá Onnu Sofíu Fjallheim eru allir hundar, ið eru við fyri fyrstu fer. Spennandi verður at fylgja hesum hundum í framtíðini.

Ein av gomlu hundunum, ið vanliga hevur klára seg væl, er ikki við, tað er Lynn hjá Onnu Sofíu Fjallheim. Hon var nummar fýra í FM í fjør. Annars eru fýra av fimm teimum bestu, frá sísta kappingar ári, við leygardagin. Teir eru Moss og Mainstay Meg hjá Tummas Jacobsen, og Gripur og Kvikk hjá Jónstein Petersen. Hesir fýra eru helst favorittar leygardagin. Svan hjá Tóroddi Vang stríðist við ein skaða, tað er ikki heilt víst um hann luttekur. Stórur missur verður í Tóka B. Mikkelsen, ið ofta hevur klára seg væl. Hann er fluttur av landinum, og luttekur ikki í kappingini.

Veðurforsøgnin sær ikki gott út seinnapartin leygardagin, so ætlanin er at byrja tílja. Luttakarar og dómari fara at ganga ígjøgnum breytina kl 08:00, og so byrjar kappingin so skjótt nóg ljóst er. Hetta er fyri at tað skal verða liðugt áðrenn tað ringasta veðrið.

Norðoya seyðahundafelag bjóðar øllum Norð at hyggja, og fáa eitt gott seyðahunda (ella bara seyða) prát.

The post Fyrsta Seyðahundakappingin í 2026/2027 kappingarárinum appeared first on Seyðahundasamband Føroya.

Føroyskur dómari dømdi í Danmark

Jónstein Petersen — Tue, 13 Oct 2026 17:24:20 +0000

Føroyskur seyðahundadómari aftur boðin til Danmarkar

Føroyskir seyðahundadómarar eru javnan bodnir til grannalond okkara at døma seyðahundakappingar. Hetta er ein viðurkenning av tí fakliga førleika og teimum royndum, sum føroyska seyðahundaumhvørvið hevur bygt upp gjøgnum árini.

Hesa ferð var tað Elmar Reinert Fjallheim, sum varð boðin til Danmarkar at døma eina kvalifikatiónskapping hjá danska seyðahundafelagnum.

At danska seyðahundaumhvørvið aftur vendir sær til ein føroyskan dómara, vísir, at føroyskir dómarar hava eitt gott umdømi og verða mettir at hava førleikar til at døma kappingar á høgum støði.

At døma seyðahundakappingar krevur stóran kunnleika til arbeiðið hjá hundinum, gott eyga fyri smálutum og evnini at meta rættvíst um avrikið hjá bæði hundi og førara. Tí er tað ein álitisváttan, tá ið fyrireikarar uttanlands bjóða føroyskum dómarum at taka lut í sínum kappingum.

Føroyar eru eitt lítið land, men vit hava sterkar siðvenjur innan seyðahald og seyðahundaarbeiði. Føroyskir hundaførarar og dómarar eru við til at knýta bond millum seyðahundaumhvørvini í londunum og at menna ítróttina tvørtur um landamørk.

Vit kunnu tí fegnast um, at Elmar Reinert Fjallheim umboðar føroyska seyðahundaumhvørvið í Danmark. Tað er bæði ein persónlig viðurkenning og nakað, sum føroyska seyðahundaumhvørvið kann vera errið av.

Føroyar eru smáar í vavi, men vit seta okkara spor í altjóða seyðahundaheiminum!

Elmar uttast til høgru.

The post Føroyskur dómari dømdi í Danmark appeared first on Seyðahundasamband Føroya.

World trial finala

Brandur Klettskarð í Kongsstovu — Sun, 20 Sep 2026 21:41:14 +0000

Faðir og sonur heimsmeistarar

Í kvøld varð avdúka hvør vann “ISDS sheep dog world trial 2026”.

Tey ið náddu í finaluna, hava kappast í allan dag. Fyrireikararnir høvdu sett eina sera torføra breyt upp. Tá døgura steðgurin var, hevði einans ein luttakari fullført breytina, áðrenn tíðin fór. Seinnapartin fullførdu fýra luttakarar afturat. Øll vistu at ein at teimum fimm fór at vinna kappingina.

Í mun til hinar dagarnar, almannakunngjørdu dómararnir ikki úrslitini leypandi. Tey vóru kunngjørd á einum stórfingnum hátíðarhaldi, aftaná finaluna.

Endin varð at David Howells og “Wyverne Pip” vunnu finaluna.

Vinnararnir av unglinga kappingini vóru eisini avdúkaðir á sama hátíðarhaldi. Jack Morgan Howells og “Cydros Boss” vunnu hesa kapping. Tað ið vekjir stóran ans, er at Jack M. Howells er sonur David Howells. Sera flott av feðgunum!

Eitt annað ið vekjur ans, er at hálv beiggji “Wyverne Pip”, “Wyverne Tan” var seldur til Føroya í 2020. Fleiri hundar í Føroyum eru undan “Wyverne Tan”.

Vit frætta frá landsliðnum at tey eru sera væl nøgd við tiltakið í Skotlandi. Tey siga at hetta var ótrúliga stórfingi at vera við til.

Landsliðið sleppur ikki heim aftur fyrr enn hósdagin. Hetta kemur av at reglurnar fyri at ferast við hundi, til føroya eru óneyðuga ólagaligar.

24 Oktober fer heimliga kappingin í gongd aftur. Vit byrja á Viðareiði.

The post World trial finala appeared first on Seyðahundasamband Føroya.

World trial, semifianlu dagur

Brandur Klettskarð í Kongsstovu — Sun, 20 Sep 2026 08:42:45 +0000

Semifinala, brace og unglingakapping

Semifinalurnar vóru í gjár. 42 teir bestu hundarnir frá innleiðandi umførunum kappaðust um 16 pláss í finaluni.

Kappingin var á breyt 1, og gekk fyri seg á sama hátt sum innleiðandi kappingarnar. Tó varð rikið mótsættan veg í “drivinum”, og 5 dómarar dømdu. Hvør dómari hevur 110 stig at geva.

Aftur sóðu vit hvussu høgt støði er á teimum bestu í heiminum. David Cole og “Aristos Juno” úr Onglandi vunnu kappingina, við 472 stigum.

Einans eitt umboð úr norðanlondum megnaði at náa finaluni. Anna Edbom og “Dánakims Sky” fingu 434 stig og tað gav eitt 9 pláss.

Á breyt 3 var fyrsta “Brace” kappingin í World Trial søguni. Jónstein Petersen var og hugdi, hann skrivar soleiðis á Facebook vanganum hjá Seyðahundasambandinum:

“Brace kallast kappingin, tá ið man brúkar 2 hundar samstundis. Tá eru 10 seyðir og tvær rættir. Tá ið hundarnir hava fingið seyðin inn í ringin, skal tann eini hundurin deila seyðin í helvt og síðani reka hann inn í eina rætt. Tá seyðurin er komin í rætt, má hundurin sum hevur fingið teir í rætt, ansa eftir teimum, so teir ikki fara út aftur. Har er einki portur á. Meðan hundurin ansar eftir seyðnum í einari rætt, fer hundaførarin við hinum hundinum at reka hinar 5 sum vóru eftir í eina aðra rætt. Rættliga imponerandi at síggja.” Sí myndir

David Kevin Evans við “Kemi Ids” og “Valley View Dan” vunnu heimsmeistara heitið í Brace.

Á breyt 2 var innleiðandi kapping um unglinga heimsmeistaraheitið, tey eru undir 21 ár. 3 unglingar vunnu seg í finaluna. Hon verður í døgura steðginum, í finaluni hjá teimum vaksnu.

Føroyar luttaka ikki í Brace og unglingakappingini.

Í Dag er finalan. Hon byrjaði tílja í morgun. Umleið kl 18:00 verður avdúka hvør er heimsmeistari.

The post World trial, semifianlu dagur appeared first on Seyðahundasamband Føroya.

World trial inleiðandi, annar dagur

Brandur Klettskarð í Kongsstovu — Fri, 18 Sep 2026 21:08:05 +0000

So vóru 42 hundar eftir

Aftur í dag vóru áskoðararnir á Huntington Farm forkelaðir!

Støði á luttakarunum var, um møguligt, uppaftur hægri enn í gjár. Luttakarin, ið vann seg í semifinaluna, við lægst stigum, fekk 180 stig av 220 møguligum.

Aftur í dag vísti David Kevin Evans síni ótrúligu evni, nú við “Bryn Moel Jet” á breyt 1. Men flottasta úrslit av øllum var tað hjá Onnu Edbom og “Dánakims Sky” úr Svøríki, tær fingu heili 210 stig, á breyt 3, tað er ein mest sum fullkomin roynd.

Føroyingarnir byrjaðu báðir væl á breyt eitt, men tá teir komu til at deila seyðin steðgaði líka sum upp, og tíðin hjá báðum fór, tá teir skuldu rætta seyðin. Tummas Jacobsen og “Moss” endaðu á 27 plássi við 137 stigum. Jónstein Petersen og “Kvikk” endaði á 36 plássi við 116 stigum.

Verandi heimsmeistarin Petter Kvernmo Landfald, úr Noreg, royndi seg beint eftir Jónstein, á breyt 3. Honum gekst so illa at rætta seyðin, at hann mátti gevast. So okkara menn høvdu onki at skammast yvir.

Av norðanlondum kláraðu tey úr Noreg seg best, við trimum semifinalu plássum. Svøríki fekk eitt pláss. Hini komu ikki víðari. Annars skaraðu walisar fram úr við heili 9 semifinalu plássum

42 luttakarar hava nú vunni seg í semifinaluna, ið verður á breyt 1 í morgin kl 08:00. Tá verður kappast um 16 finalu pláss.

The post World trial inleiðandi, annar dagur appeared first on Seyðahundasamband Føroya.

World Trial: Fyrri dagur av innleiðandi kappingini

Brandur Klettskarð í Kongsstovu — Thu, 17 Sep 2026 21:12:31 +0000

Seyðahundar á hægsta støði

Í dag byrjaði World Trial endiliga!

Og tey ið hava fylgt við á stroymingini eru forkelaði við seyðahundum á hægsta støði. Seyðurin á Huntington Farm er avbjóðandi at reka, tað er ikki ov nógv sagt. Men tað ger at teir bestu hundarnir rættuliga sleppa at vísa seg.

Nevnast kunnu tveir menn, ið eru kendir í Føroyum, ið skaraðu fram úr, við teirra hundum. David Kevin Evans við “Kemi Jack” og Serge van der Zweep við “Beau”. Eisini kann nevnast at Kaja Zupec við “Indi”, úr Slovenia, í løtuni liggur nummar 3, á breyt nummar 1. Hetta gevur helst eitt semifinalu pláss. Hetta er fyrstu ferð at Slovenia er við í kappingini.

Okkara egni Jónstein Petersen royndi seg við Gripi (ikki Kvikk, ið vit skrivaðu í gjár). Tað gekk ikki eftir vild hjá teimum báðum. Teir fingu 84 stig og endaðu á 38 plássi, á breyt 3. Hetta røkkur ikki til semifinaluna.

Av tí at innleiðandi umførini ikki gjørdust heilt liðug í dag, verður byrja kl 06:30 í morgin ári. Tá fáa vit at síggja hvør røkkur semifinaluni.

Tummas Jacobsen og “Moss” og Jónstein Petersen og “Kvikk”, skulu allir royna seg á breyt 1 í morgin. Tummas verður eftir ætlan nummar 11 í røðini, við nummar 152 á rygginum. Jónstein verður eftir ætlan nummar 26 í røðini, við nummar 167 á rygginum.

The post World Trial: Fyrri dagur av innleiðandi kappingini appeared first on Seyðahundasamband Føroya.

World trial I

Brandur Klettskarð í Kongsstovu — Wed, 16 Sep 2026 21:10:58 +0000

Seyðahundarnir koma heim

Setanin av World Trial var í dag 16 september. Nógv varð gjørt burtur úr. Allir luttakarirnir gingu skrúðgongu. Tummas Jacobsen var flaggberi hjá Føroyum.

Seinni stillaðu Jónstein, familjan og hundarnir upp til myndatøku hjá fyriskiparunum.

World trial verður hildi triðja hvørt ár. Vanliga er kappingin í einum av teimum bretsku londunum: Skotlandi, Wales, Onglandi ella Írlandi. Í ár verður gjørt serliga nógv burtur úr at “seyðahundarnir koma heim”. Hetta kemst av at Border Collie hundarnir upprunaliga koma úr økinum við markið í millum Ongland og Skotland, har kappingin er í ár.

Væntandi verða í millum 20 og 30 túsund gestir hesar 5 dagarnir tiltakið varir. Har aftur at verður vænta at fólk úr øllum heiminum fara at fylgja við á stroymingini.

Innleiðandi umførini byrja í morginári, tá skulu Jónstein og Kvikk royna seg á breyt 3. Teir eru nummar trý í røðini. Man skal tíðliga upp fyri at síggja teir, tí kappingin byrjar kl 07:30.

The post World trial I appeared first on Seyðahundasamband Føroya.

Aðalfundur

Jónstein Petersen — Wed, 15 Apr 2026 17:03:43 +0000

Seyðahundasamband Føroya hevði aðalfund sunnudangin 12. apríl í ÍSF-húsinum, og uppmøtingin var góð.

Fyri vali stóðu Anna Sofía Fjallheim og Tóki Berg Mikkelsen. Anna Sofía Fjallheim tók við afturvali, men Tóki Berg Mikkelsen stillaði ikki upp aftur og í hansara stað kom John Arne Svabo Samuelsen.

Einasta broyting í nevndini varð sostatt, at John Arni Svabo Samuelsen kom beinleiðis inn fyri Tóka Berg Mikkelsen sum peningarøkil.

Nevndin sær soleiðis út:

Jónstein Petersen, formaður

Tummas Jacobsen, næstformaður

Anna Sofía Fjallheim, skrivari

John Arne Svabo Samuelsen, peningarøkil

Sigtór Dam, nevndarlimur

Brandur Klettskarð í Kongstovu, eykalimur

Hans Jóhann Sørensen, eykalimur

Nevndin í Seyðhundasambandi Føroya vil takka Tóka Berg Mikkelsen fyri tað stóra arbeiði hann hevur gjørt fyri Seyðahundasamband Føroya og ynskir honum blíðan byr í framtíðini.

Nevndin

The post Aðalfundur appeared first on Seyðahundasamband Føroya.